Şam-SANA
Alîkarê Wezîrê Navxwe yê Karûbarên Polîsan Lîwa Ehmed Mihemed Letûf û Alîkarê Rêveberê Rêveberîya Koçberî û Pasaportan Eqîd El-Welîd Erabî, di gera xwe ya li Balafirgeha Navneteweyî ya Şamê de, rêkar û xizmetguzarîyên ku ji bo hecîyên Mala Xwedê tên pêşkêşkirin, berîya ku berê xwe bidin Axa Pîroz ji bo encamdana îbadetên hecê, kontrol kirin.
Wezareta Navxwe di daxuyanîyekê de li ser kanala xwe ya Telegramê îro Pêncşemê dîyar kir ku ev ger şopandina mekanîzmaya birêxistinkirina tevgera hecîyan di hundirê balafirgehê de, û piştrastkirina amadebûna kadro û xebatkarên di beşên cuda de li xwe digire, da ku leza qedandina serederîyan û pêşkêşkirina hêsankarîyên pêwîst ji bo hecîyan were misogerkirin.
Her wiha Lîwa Letûf û Eqîd Erabî bi hejmarek hecîyan re civîyan û guh dan daxwaz û têbînîyên wan ên derbarê xizmetguzarîyên tên pêşkêşkirin. Wan tekez kir ku Wezareta Navxwe bi her awayî hewl dide her tiştê pêwîst dabîn bike da ku rihetî û hêsankirina rêkarên geşta wan di baştirîn şert û mercan de were garantîkirin.
