Şam-SANA
Dîplomatkarê di Wezareta Karên Derve de Îyad Heza’ tekez kir ku rêxistina “HSD”ê berpirsyarîya binpêkirina lihevkirinên agirbestê hildigire, û destnîşan kir ku hikûmeta Sûrîyê tekezîyê li ser parastina mafê xwe yê rewa di parastina serwerî û ewlehîya niştimanî de dike.
Heza’ di daxuyanîyekê de ji bo SANAyê got: “Geşedanên li rojhilatê Firatê encama sîyaseta ‘rastîya heyî’ ne ku HSDê li derveyî çarçoveya dewletê meşandîye; pêşengîya Şamê sepandina serwerîya qanûnê, parastina sivîlan û bidawîanîna her çekeke neyasayî ye.”
Navborî bal kişand ser wê yekê ku peymana 10ê Adara borî ji ber nebûna cidîtîyê û hewldana sepandina realîteyeke cudaxwaz bi ser neket, lê lihevkirina nû ya di 18ê vê mehê de piştî bidawîanîna rêyên sîyasî û destwerdana dewletê ji bo sepandina aramîyê pêk hat.
Heza’ amaje pê kir ku sedema sereke ya lihevkirinê zêdebûna metirsîyên ewlehîyê û têkçûna rêveberîya neyasayî bû, û careke din tekez kir ku hatina Şamê bo herêmên Cizîrê ji bo parastina yekîtîya Sûrîyê û rêgirtina li ber rijandina xwînê bû.
Heza’ dîyar kir ku lihevkirin radestkirina hemû çekên giran û navîn ji bo dewleta Sûrîyê li xwe digire, ji ber ku ew tenê alîyê xwedî maf e ku çek di dest de be.
Derbarê senaryoyên pêşbînîkirî di dema hilweşîna agirbestê de, Heza’ eşkere kir ku hemû vebijark vekirî ne; ji çareserîya sîyasî bigire heya destwerdana ewlehî yan leşkerî ya hesabkirî ji bo parastina sivîlan û kutakirina tevlîhevîyê.
Dîplomatkarê di Wezareta Karên Derve de Îyad Heza’ tekez kir ku tevlîkirina HSDê di nav sazîyên dewletê de mijareke serwerîya navxweyî ye û hevahengîya bi hevalbendan re berdewam e.
Heza’ di dawîyê de dîyar kir ku vegerandina çavkanîyên petrol, gaz û avê wê bikeve xizmeta hemû Sûrîyan û ji bo başkirina xizmetguzarîyan, piştgirîya avakirin û aramîya aborî were bikaranîn.
