Şam-SANA
Civata Giştî ya Komîteya Jinên Kar di Odeya Bazirganî ya Şamê de, îro Yekşemê 7 endamên nû ji nav 11 berbijêran hilbijartin, ev yek di civînekê de ku li baregeha odeyê hat lidarxistin pêk hat.
Encamên hilbijartinan bi serkeftina van kesan bi dawî bû: Lîna Enaye, Rîma El-Omerî, Nadya El-Bekrî, Elîya El-Tercuman, Leyla El-Osta, Lema Cerko û Semer El-Ezreq wekî endamên komîteyê, bi serokatîya Nadîn Şawî û cîgirîya wê Leyla El-Seman. Berbijêran şîyan û bernameyên xwe yên ku armanc jê xurtkirina rola jinên kar û geşepêdana çalakîyên odeyê ne, pêşkêş kirin.
Rola Jinê di Aborîya Sûrî de
Serokê Odeya Bazirganî ya Şamê, Îsam El-Xerîwatî, girîngîya rola jinê di vejîna aborî û bazirganî de tekez kir. Wî destnîşan kir ku ode pabend e bi piştgirîkirina jinên kar û keçên ciwan ên xwedî xewn yên ku dixwazin bikevin cîhana mal û karsazîyê.
Xurtkirina Rola Jinê û Pêşengîya Kar
Seroka Komîteya Jinên Kar, Nadîn Şawî, tekez kir ku jina Sûrî xwedî şîyan e ku bandoreke çalak di civakê de bike. Wê dîyar kir ku hevgirtina hewlên beşdaran bingehek e ji bo xurtkirina pêgeha jinê di sektora karsazîyê de.
Cîgira seroka odeyê, Leyla El-Seman, zelal kir ku armancên komîteyê xurtkirina pêşengîya kar, berpirsîyarîya civakî û avakirina şîyanên (kapasîte) jinan li xwe digire. Wê bang li hemû jinan kir ku ji bo serkeftina hevbeş bi awayekî çalak beşdar bibin.
Xurtkirina Beşdarîya Jinê
Lema Cerko (endama komîteyê) tekezî li ser rola komîteyê di bi hêzkirina jinê de ji alîyê aborî ve û berêxwedana ber bi veguhastina dîjîtal ve ji bo piştgirîya jinên kar kir. Wê bang li jinên Sûrî yên li derveyî welat kir ku vegerin û beşdarî jinûveavakirina welat û geşepêdanê bibin.
Rîma El-Omerî, yek ji serkeftîyan, amaje bi wê yekê kir ku hebûna jinan di odeyê de dê rahênan (perwerdehî) û bi hêzkirinê xurt bike, û peywendîya bi jinên kar ên li derveyî welat re xurttir bike da ku projeyên hevbeş di sektorên giştî û taybet de werin meşandin.
Odeya Bazirganî ya Şamê (sala 1830 hat damezrandin) yek ji kevintirîn odeyên herêmê tê hesibandin. Armanca wê piştgirîkirina sektora karsazîyê bi şêwirmendî û agahîyan e, her wiha nûnertîya bazirganan li pêşberî hikûmetê dike û beşdarî amadekirina qanûnên aborî û xurtkirina bazirganîya derveyî dibe.
