Şam – SANA
Wezareta Ewqafê rênima û şertên dawî yên tomarkirina hecîyên sala bê ya 1447k. – 2026z. derxistin, û ragihand ku derîyê dayîna mesrefan ji bo hecîyên ku di tîrûpișka hecê de hatine qebûlkirin, ji Şemîya bê ve tê vekirin.
Wezaretê wextê dayîna pereyan ji 3-22yê Kanûna Paşîn destnîşan kir, rojane ji bilî roja Înê, û da zanîn ku kesê dereng bimîne, wekî kesê ku dev jê berdaye tê hesibandin.
Mesrefa Geşta Hecê
Wezaretê mesrefa geştê li gorî asta xizmetê û cihê tomarkirinê wiha dîyar kir:
Asta Aborî: 4750 Dolarê Amerîkî ji bo hecîyên li hundir, û 4900 Dolar ji bo hecîyên li derveyî Sûrîyê xwe qeyd kirine.
Asta Baş û ya 5 Stêrk: Dayîn li gorî bernameya ku ji bo her teketul û komê hatiye ragihandin pêk tê, bi şertê ku ji bo asta 5 stêrk 5000 Dolarê Amerîkî li bankên pejirandî û ya mayî jî ji serokê komê re were dayîn.
Wezaretê da xuyakirin ku ev mesref “cihê mayînê, xwarin û vexwarin, veguhestina navxweyî, balafir û xizmetên îdarî li xwe digire; lê nirxê qurbanîyê (Hedî), odeyên taybet û mesrefên çûna balafirgehê jê cuda ne.
Rêkarên Dayînê û Kaxezên Pêwîst
Wezaretê mekanîzma dayînê bi çar gavan destnîşan kir: Hilbijartina komeke pejirandî, îmzekirina girêbestê bi destê xwe, piştre dayîn mesrefê li cihên pejirandî (Banka El-Bereke, “Şam Kaş”, an Banka Navendî li Dêrazorê). Lê li derveyî Sûrîyê, dayîn û hilbijartina komê li nivîsgehên Rêveberîya Hecê bi xwe pêk tê.
Belgeyên ku di dema dayînê de tên xwestin (ji bo kesên ku radest nekirine) ev in: Bawernameya tenduristîyê, pasaport (ku heta 1/12/2026an derbasdar be), wêneyekî şexsî, kopîya girêbestê, îsbatkirina mirovatîyê ji bo mehreman, û wêneyê îqameyê ji bo kesên li Tirkîyê rûdinên.
Agahîyên Girîng
Wezaretê amaje bi nirxê qurbanîyê (hedî) kir ku li ser hecîyan ferz e (çi Qarin çi Mutemeti’ be) ku divê bi rêya “Rêça Elektronîkî ya Siûdî” were dayîn, ku ew jî 192 Dolarê Amerîkî ye (ku dike 720 Rîyalê Siûdî).
Sefer jî tenê di rêya balafirgeha (Şam, Heleb, Stenbol, Gazî Entab, Qahîre)yê re û di çarçoveya geştên komî de pêk tê û sefera takekesî qedexe ye.
Kesê ku ji ber şert û mercên dijwar xwe vekişîne, daxwaza kesê herî bi temen tê qebûlkirin, û ew mesrefên ku pêşwext hatine dayîn nayên vegerandin, tevî ku pereyê mayî (heke hebe) piştî bidawîbûna demsala Hecê tê vegerandin.
Wezaretê bang li hecîyan kir ku pabendî wext û rênimayan bin, û beşdarî civînên îdarî û şer’î bibin yên ku ji alîyê serokên koman ve tên birêxistin.
Rêveberîyê tîrûpișka Hecê ya demsala 1447k. – 2026z. di 24ê Kanûna Pêşîn a borî de li Pirtûkxaneya Niştimanî a Şamê li dar xistibû.
