Şam-SANA
Rêveberê Pêwendîyan li Desteya Giştî ya Derîyên Sînorî yên Bejahî û Deryayî Mazin Elûş got: Di demjimêrên dawî de, platformên medyaya civakî bi rengekî berfireh behsa belavbûna agahîyên ne rast dikin derbarê “fîşa (danegeha) qedexeya rêwîtîyê” ya welatîyên Sûrîyeyê, xasma li derîyên sînorî yên bi Tirkîyeyê re.
Elûş li ser rûpela xwe ya fermî ya Facebookê dîyar kir ku di çend mehên borî de, hin xalên sînorî bi pergaleke derbasbûnê ya navxweyî ya taybet bi wan xalan kar dikirin, ku ji pergala elektronî ya navendî ku li cem Wezareta Navxweyî hatiye pejirandin, cuda ye.
Li gorî Elûş, bi destpêkirina xebata bi pergala elektronî ya nû re, li cem hin rêwîyan daneyên kevn ên têkildarî “serdanan” an “daxwazên girtinê” ku ji hêla dezgehên ewlehîyê yên rejîma berê hatibûn derxistin derketin holê, û ev yek bû sedema tevlîhevîyê li cem kesên ku ji Tirkîyeyê dihatin û hînî vê hûrgilîyê nebûbûn.
Navborî mijar zelaltir kir û got: Em ji raya giştî re tekez dikin ku mijara “fîşê” rêkareke taybet a Wezareta Navxwe ya Sûrîyeyê ye, û ji alîyê Desteya Giştî ya Derîyên Sînorî yên Bejahî û Deryayî ve nehatiye derxistin, û rola desteyê tenê birêxistinkirina tevgera derbasbûnê û pêşkêşkirina hêsankarîyan ji rêwîyan re ye.
Wezîrê Navxwe Enes Xetab duh ragihandibû ku zêdetirî 150 hezar rêkarî ji databasa fîşên Koçberî û Pasportan hatine jêbirin, ku piranîya wan girêdayî rêkarên berê yên sazîyên Berevanî, Navxwe û dezgehên ewlehîyê yên serdema rejîma şikestî ne.
Ev gav wekî temamkirina cîbicîkirina biryara hejmar /20/ a ku di meha Adara borî de ji alîyê Wezareta Navxwe ve hatibû derxistin tê, ku li gorî wê nêzîkî 4,700,000 rêkar hatibûn rakirin, ku piranîya wan girêdayî cudabûn, paşketina ji xizmeta leşkerî ya neçarî yan qedexeya derketin û rêwîtîkirinê ji ber sedemên ewlehîyê yên cihêreng bûn.
