Şam-SANA
Wezareta Tenduristîyê di sala 2025an de li ser xurtkirina çalakbûn û kalîteya pergala çavdêrîya tenduristîyê kar kir, bi rêya nûjenkirina sazîyên tenduristîyê yên wêranbûyî, ji bo xurtkirina sîstemên rêvebirinê, lênêrîna tenduristîyê ya bingehîn û çalakkirina sîstema ewlehîya tenduristîyê ya niştimanî.
Di vê çarçoveyê de, Plana Stratejîk a Tenduristîyê ya Niştimanî hat destpêkirin. Her wiha Wezareta Tenduristîyê bi wezaretên din re di projeyên niştimanî de hevkarî kir, mîna pêşnîyara bi wezaretên Darayî, Çandinî û Enerjîyê re bi nirxa 25 mîlyon dolarî ji bo “Sindoqa Pandemîyê”, bi armanca xurtkirina ewlehîya tenduristîyê.
Her wiha ligel Wezareta Darayî “Peymana Niştimanî ji bo Vegirtina Tenduristîyê ya Giştî” hat îmzekirin, û bi piştevanîya teknîkî ya rêxistina UNICEFê pêşnîyareke niştimanî ji bo rûbirûbûna kêşeyên xurekîyê hat amadekirin.
Di warê pîşeyên tenduristîyê de, wezaretê li ser nûjenkirin û amadekirina Rêveberîya Pîşeyan kar kir û planek ji bo restorekirina dibistanên perestarîyê li gelek parêzgehan amade kir. Her wisa pîvanên bingehîn ji bo avakirina stratejîya perestarîyê ya 5 salên bê hatin dîyarkirin.
Ji alîyekî din ve, Rêveberîya Sazîyên Tenduristîyê 108 gerên çavdêrîyê li ser nexweşxaneyên taybet (ku hejmara wan 400 nexweşxane ye) pêk anîn. Di encamê de 89 destûrên nû hatin dayîn an guhertin, û 26 nexweşxane ji ber binpêkirin û gilîyan hatin girtin.
Sektora tenduristîyê li Sûrîyê rûbirûyî astengîyên mezin dibe, loma wezaret di plana sala nû de hewl dide hemû kêmasîyan derbas bike da ku xizmetên destnîşankirina nexweşîyan û dermankirinê bi pêş bixe.
