Heleb-SANA
Rêveberîya Karûbarên Sivîl li parêzgeha Helebê îro Yekşemê, daîreyeke nifûsê li devera Cindirêsê ya li gundewarê bakurê Helebê vekir; daîre xizmeta nêzîkî 60 gund û bajarokî dike.
Ev pêngav bi mebesta hêsankirina cîbicîkirina miameleyên xelkê û dabînkirina xizmetguzarîyên qeyda sivîl li herêmê pêk hat.
Rêveberê Karûbarên Sivîl li parêzgeha Helebê Mihemed El-Şewax ji SANAyê re dîyar kir ku vekirina vê daîreyê ji ber dûrbûna Cindirêsê ji navenda bajarê Helebê û berfirehbûna çarçoveya wê ya erdnîgarî ye. Wî her wiha da zanîn ku xizmetên daîreyê devera Şêx Hedîd a cîran jî li xwe digire.
Daîreya nû ya ku navenda wê li kêleka avahîya rêveberîya nahîyeyê ye, xizmetên derxistina belge û daneyên tomarkirî yên di danegehê de, ligel tomarkirina rûdanên kesane pêşkêş dike.
Ji hêla xwe ve, endamê Ofîsa Cîbicîkar li parêzgeha Helebê û serperiştyarê sektora rewşa sivîl Ehmed Yasîn di daxuyanîyeke hevşêwe de da zanîn ku vekirina daîreyê di çarçoveya plana nûjenkirin û restorekirina avahîyên karûbarên sivîl de tê, li gorî nasnameya dîtbarî ya pejirandî ji alîyê Wezareta Navxwe ve.
Yasîn destnîşan kir ku ev pêngav piştî temamkirina proseya yekkirina wan daneyên ku li herêmên bakur bûn bi daneyên navendî yên dewleta Sûrîyê re pêk hat, da ku pêşkêşkirina xizmetguzarîyên rewşa sivîl bi nasnameyeke yekgirtî were garantîkirin.
Yasîn bal kişand ser wê yekê ku navendên rewşa sivîl pişta xwe dispêrin mekanîzmayên kar û dîjîtalîzekirinê yên ku di lezkirina birêveçûna karûbaran û hêsankirina gihîştina welatîyan bo xizmetguzarîyê dibin alîkar.
Her wiha da xuyakirin ku plana Rêveberîya Karûbarên Sivîl vekirina nêzîkî 12 navendên rewşa sivîl heta dawîya îsal li xwe digire.
