Heleb – SANA
Li gorî amarên destpêkê, berbanga îro Duşemê, di encama teqînekê de li embareke cebilxaneyê li devera El-Îsê ya li başûrê gundewarê Helebê çar kes birîndar bûn.
Di vê navberê de tîmên Parastina Sivîl xebatên valakirina xanîyên derdorê û girtina rêyên ber bi deverê ve didomînin.
Parastina Sivîl li ser kanala xwe ya Telegramê ragihand ku di encama teqînê de sivîlek bi parçeyên teqînê birîndar bûye, du kes tûşî bêhntengîyeke demkî bûne û her wiha sivîlekî din jî dema hewl dida ji deverê dûr bikeve, di qezayeke trafîkê de birîndar bûye.
Hat dîyarkirin jî ku tîman birîndar veguhastine nexweşxaneyan û 3 malbat ji derdora cihê bûyerê vala kirine; her wiha ji ber berdewamîya teqînan, tîmên li herêmê hîn jî di rewşa amadebaşîyê de ne.
Rêveberê Operasyonên Helebê li Rêveberîya Rewşên Awarte û Birêvebirina Karesatan Feysel Mihemed Elî, di daxuyanîyekê de ji bo SANAyê dîyar kir ku berdewamîya teqînan bûye asteng li pêşîya gihîştina tîmên rizgarkirin û hawarçûnê, berî ku tîmên Parastina Sivîl karibin derbasî herêmê bibin û her çar birîndaran rizgar bikin.
Elî da zanîn ku ji bo parastina ewlehîya sivîlan û hêsankirina xebatên tîmên rizgarkirinê, xebatên valakirina xanîyên nêzîkî cihê teqînê û girtina rêyên ku diçin herêmê berdewam dikin.
