Dêrezor – SANA
Wezîrê Rewşên Awarte û Birêvebirina Karesatan Raid El-Salih ragihand ku ji ber rabûna ava çemê Firatê li Dêrezorê 2400 malbat zîyan dîtine, û tekez kir ku asta avê niha vegerîyaye ser rêça xwe ya asayî û tu zîyanên canî yên nû nehatine tomarkirin, ji bilî xeniqandina çend zarokan ku berê di dema avjenîyê de canê xwe ji dest dabûn.
Bilindbûna asta avê bi awayekî berbiçav bandor li Dêrezor û Reqayê kir, û herêmên li ser çem û zevîyên çandinîyê kirin armanc. Wezîr îro Înê ji nêz ve û bi awayekî meydanî planên tîmên hawarçûnê şopandin, piştî ku duh Pêncşemê civîneke berfireh ligel fermandarên Berevanîya Sivîl a Sûrîyê ji bo xurtkirina bersivdanê li dar xistibû.
Wezîr dîyar kir ku Serok Ehmed El-Şeri’ rûdanan dişopîne û ferman daye ji bo sivikkirina êş û azarên xelkê. Ji bo dîtina çareserîyên bilez û mayînde, wezaret îro dicivin, hevdem ligel ku Wezareta Parastinê îro Înê hêzên xwe xistine rewşa amadebaşîyê da ku beşdarî rûbirûbûna encamên lehîyê bibin û xelkê biparêzin.
