Şam-SANA
Komîteyên lihevanînê yên ser bi Encumena Lihevanînê ya Giştî li Şamê, rêyên çalakkirina rola navbeynkarîya civakî û xurtkirina nirxên lihevanînê, her wiha berfirehkirina qada xebata komîteyan da ku mijarên berfirehtir li xwe bigire gengeşe kirin. Ev yek di civîneke hevahengîyê ya berfireh de ku duh Şemîyê li baregeha encumenê ya li taxa El-Emînê ya Şamê hat lidarxistin, pêk hat.
Serokê Komîteya Navendî li Encumena Lihevanînê ya bajarê Şamê Ebdo Remezan, ji nûçegihanê SANAyê re dîyar kir ku Encumena Lihevanînê ya Giştî ber bi temamkirina pêkhateya xwe û ragihandina wê ya fermî li ser asta Sûrîyê di dema bê de diçe.
Encumenên lihevanînê yên giştî yên ku li bajar û bajarokên Sûrîyê belav bûne, ku rûsipî, yasanas û zanayên olî li xwe digirin, wekî modelekê ji bo xebata sivîl a temamker a li ser bingeha hevkarîya civakî û hevahengîya bi sazîyên fermî re têne hesibandin, ku ev encumen di belavkirina çanda lêborîn û toleransê de beşdar dibin.
Rola van encumenan tenê bi pêkanîna lihevanînê di navbera alîyên nakok de sînordar nabe, lê belê di kêmkirina barê ser dadweryê û xurtkirina çanda hevjîyanê de jî beşdar dibe, ku ev yek piştgirîya aramîya civakî dike û di xurtkirina hevgirtina civaka Sûrîyê de, li gorî berpirsên van encumenan, dibe alîkar.
