Şam – SANA
Îro li Parêzgeha Şamê, bi boneya salvegera yekemîn a serkeftina Şoreşa Sûrîyê ya Mezin li dijî rejîma sûcdar û serdema wê ya zordar, çalakî û şahîyên gelêrî pêk hatin. Welatî li qad û taxên sereke kom bûn da ku kêfxweşîya xwe bi vê helkeftê nîşan bidin, ku piştî 14 salan ji zilm û êşê, hêvî û aramî vegerand.
Li Qada Emewîyan, beşdaran tekez kir ku tevî kêşe û zehmetîyan, gîyanê hêvî û vînê dilê zarokên Sûrîyê dadigire. Li Kolana Xalid bin Welîd jî, welatîyan şanazîya xwe bi serkeftina ku bi rizgarkirina tevahîya axa Sûrîyê ji rejîma hilweşîyayî pêk hatiye, anîn ziman.
Beşdarên li taxa Mîdanê ala Komara Erebî ya Sûrîyê û dirûşmên ku tekezî li ser yekîtîya niştimanî û hevgirtina gel dikin hildan. Her wiha şênîyên taxa Qabûnê destnîşan kir ku ev şahî ruhê têkoşîn, berxwedan û dilsozîyê nîşan dide. Komîteya taxa Dummerê jî bi beşdarîya çalakîyên civakî, çandî û çalakîyên ciwanan ji şênîyên taxê û deverên cîran şahîyeke girseyî li dar xist.
8ê vê Kanûna Pêşîn (Çileya Pêşîn) hevdemî salvegera yekemîn a Cejna Rizgarîyê û serkeftina Şoreşa Sûrîyê ye. Ev boneyeke niştimanî ye ku Sûrî bi rêya wê derbasî qonaxeke nû dibin û daxwazên xwe yên ji bo paşerojeke ewletir, aram û geştir dûpat dikin.
Her wiha ev bîranîn derfetê dide nifşên nû ku dîroka welatê xwe fêm bikin, bi awayekî çalak beşdarî avakirina siberoja wî bibin û nasnameya niştimanî û nirxên çandî xurt bikin. Ev yek dilsozîya ji bo şehîdan tekez dike û destpêkirina qonaxeke nû ya xebat, avakirin û pêşveçûnê tîne ziman, ku Sûrîya azad û aram ku her welatîyek hêvîya wê dike, dirust dike.
