Hema-SANA
Serok Ehmed El-Şeri’ tekez kir ku Hemayê derseke mezin di fidakarîyê de daye hemû neteweyê, û deynekî Sûrîyan ji wê re heye, û îro erk e ku em vî deynî bi hemû hezkirin û biratî bidin. Her wiha amaje bi wê yekê kir ku dijwarîya avakirinê, yekîtîya Sûrîyan û hevgirtina hemû hewldanan dixwaze.
Serok El-Şeri’ di gotarekê de di dema çalakîyên kampanyaya “Feda ji bo Hemayê” de got: “Em nikarin ji xelkê Hemayê paşve bimînin, lewma em bi lez hatin da ku tevlî vê kombûnê bibin, nemaze ku xelkê Hemayê van hemû salên dirêj sebir kir.” Wî dîyar kir ku birîna Hemayê ne tenê ya xelkê wê bû, lê belê ya hemû Sûrîyan, hemû cîhana Erebî û Îslamî û hemû xwedîyên wijdana zindî bû, û ev birîn zêdetirî çil salan berdewam bû û paşê kewîya.
Serok El-Şeri’ bi berdewamî got: “Di rojên wekî îro de ji sala borî, me xalên dawî li Şerê Mezin, şerê ‘Bersivdayîna Êrîşê’ datanîn, ku hemû mercên xwecihî ber bi betalkirina vê biryara mezin a ku ji bo vî şerî hatibû dayîn ve diçûn. Lê me rewş nirxand û himeta xelkê û tiştê ku Sûrîyan piştî vê hemû êşê heq kirine dît, lewma me pişta xwe bi Xwedayê Mezin û Dilovan girê da.” Wî dîyar kir ku rizgarkirina Hemayê di rêveçûna şer de werçerxaneke pir mezin bû û got: “Ya girîngtir ew e dema me got ‘serkeftina ku tolhildan tê de nîne’, û spas ji Xwedê re ev sernav yek ji bûyerên kêmwêne yên dîrokê bû ku bi saya Xwedayê Mezin bi destê we pêk hat.”
Serok El-Şeri’ ronî kir ku Hema dibistanek bû di fedakarî û sebrê de û her wiha dibistanek bû di rizgarkirinê de, her wiha dibistanek bû di bilindbûna li ser birînan û nêrîna li pêşerojê ligel jibîrnekirina raborîyê û got: “Divê em pêşeroja xwe li ser bingeha raborîya biêş ava nekin, lê belê divê em li ser bingeha berjewendîyên gelan û berjewendîya Sûrîyan di pileya yekem de ava bikin.”
Serok El-Şeri’ got: “Îro dema avakirin û avedankirinê dest pê kir, û ya girîngtir ji vî malê mezin ê ku hatiye komkirin, ew e ku em yekîtîya Sûrîyan û hevgirtina di navbera wan de ji bo avakirina vî welatî bibînin.” Wî tekez kir ku sira serkeftina şer, ew hevgirtin bû ku di navbera çalakvanên Şoreşa Sûrîyê de çêbû, û amaje kir ku dijwarîya avakirinê jî yekîtîya Sûrîyan û hevgirtina hemû hewldanan dixwaze da ku em armanca avakirin û geşepêdanê deynin ber çavên xwe.
Serok El-Şeri’ domand: “Gelekî ku mîna xelkê Hema, Hums, Îdlib, Dêrazorê, Heseke, Reqa, Der’a, Heleb, Lazqîye, Tertûs, Siwêda û Quneyterayê tê de hebe, ev gel hêja ye ku welatekî pêşketî û mezin ava bike û em bi îzna Xwedê bi Sûrîya pêşerojê li ber cîhanê serbilind bin. Îro gelek dijwarî rûbirûyî Sûrîyê dibin, lê em bi dîtina van rûyên pak di aştîyê de, bi ser wan de zal dibin.”
Serok El-Şeri’ amaje bi wê yekê kir ku Hemayê derseke mezin daye hemû neteweyê di fidakarîyê de, û divê îro jî derseke mezin bide hemû neteweyê di avakirin, pêşketin, mezinbûn û pêkvejîyana di navbera me de û got: “Hûn jî mînakeke pir girîng in ji bo pêkvejîyana aştîyane li Sûrîyê. Hemû xelk, Sûrîyan ji parçebûn û nebûna pêkvejîyan û lihevkirinê ditirsînin, lê Hema mezintirîn mînak e ku ji cîhanê re piştrast bike ku ew dikare bi hev re û bi xwe re bijî, lewma em qet li ser Hemayê natirsin, belkî em hêzê jê werdigirin.”
Serok El-Şeri’ dîyar kir ku gundewarê bakurê Hemayê roleke mezin di Şoreşa Sûrîyê ya pîroz de lîst û baceke mezin jî da ji ber wê piştevanîya ku li Şoreşê kir, û ev berdêl bû sedema wêrankirina gelek gund, bajar, bajarok û binesazîyan û axaftina xwe wiha qedand: “Em bi biryar in ku wan ava bikin, û her kesê ku beşdarî û alîkarîya avakirina van bajarokên wêrankirî bike û alîkarîya vegera xelkê li ser mal û zevîyên wan bike, rûmeteke mezin dibe para wî. Lewma, ez bawer im ku deynek li stûyê Sûrîyan ji bo Hemayê heye, û îro erk e li ser me ku em vî deynî bi hemû hezkirin û biratî bidin.”
