Heleb-SANA
Îro yekem rûniştinên dadgeha vekirî ya bersûcên binpêkirinên bûyerên peravê li Koşka Dadê ya Helebê, bi amadebûna malbatên qurbanîyan dest pê kir.
Beşa yekem a rûniştinê dadgehkirina 7 kesên girtî bi tohmeta derxistina fitneya mezhebî, dizî û êrîşkirina ser hêzên ewlekarîya navxweyî û hêzên Artêşa Erebî ya Sûrîyê li xwe girt. Beşa duyem jî dadgehkirina 7 endamên serberdayî yên ku bi tawana dizî û kuştinê tên tohmetbarkirin, li xwe girt.
Serokê Komîteya Niştimanî ya Lêkolîn û Vekolîna Rastîyan di Bûyerên Peravê de, Dadger Cuma El-Enzî, li ser platforma Xê tekez kiribû ku ev dadgehkirin kêlîyên girîng di dîroka welêt de ne, ku wêneyekî Sûrîyê yê ku bingehên dadperwerî û zelalîyê datîne, raber dikin.
Di 22ê Tîrmeha borî de, Komîteya Niştimanî ya Lêkolîn û Vekolîna Rastîyan di Bûyerên Peravê de raporek weşandibû, tê de hatibû dîyarkirin ku di 6ê Adara borî de, bermahîyên rejîma rûxîyayî rêzek operasyonên dijminane yên berfireh pêk anîbûn.
Komîteyê her wisa destnîşan kir ku bi rêya îfadeyên şahidan ji malbatên qurbanîyan, niştecihên herêmê û karmendên hikûmetê, û her wiha bi rêya tomarên lêpirsîna girtîyan, lêkolîna belgeyên dîjîtal û belgeyên din, gihîştiye navên 265 tawanbaran.
Komîteyê di lêkolînên xwe de bal kişandiye ser vekolînkirina nasname û paşxaneya bikeran bi rêbazên curbicur, û bi rêya bersivdana Wezareta Berevanîyê ya ji bo daxwaza Komîteyê di naskirina kesên di wêne û vîdeoyên destnîşankirî de, gihîştiye naskirina 298 kesan bi navên wan ên eşkere yên ku gumanbar in di binpêkirinan de beşdar bûne.
Di 10ê Nîsanê de, Serok Ehmed El-Şeri’ biryarek derxistibû ku dema kar û xebatên Komîteyê tenê sê mehên din bê dirêjkirin.
