Şam-SANA
Serokê Komîteya Niştimanî ya Lêpirsîna Bûyerên Siwêydayê, Dadwer Hatim El-Ne’san, tekez kir ku komîte pabend e bi eşkerekirina rastîyê, dîyarkirina berpirsyarîyan û misogerkirina edaletê ji bo qurbanîyên bûyerên heyva Tîrmeha borî, ku bûn sedema jidestdana can û milkan, koçberkirina bizorê û gurkirina gotara nefretê.
El-Ne’san da xuyakirin ku karê komîteyê li gor biryara 1287 a sala 2025an e, her weha li gor yasayên niştimanî û peymanên navdewletî ye, û erkê wê ew e ku lêpirsînê derbarê tawanan de li gor yasaya sizayan û rêzikên yasaya navdewletî ya mirovahî bike.
El-Ne’san her weha got ku rêbaza komîteyê li ser bingeha serbixwebûn, bêalîbûn, zelalî û parastina qurbanî û şahidan ava dibe, û li gor vê rêbazê divê xalên veşartî yên bûyeran bên eşkerekirin, lêpirsîn derbarê binpêkirinan bêne kirin, gumanbar bên destnîşankirin, sizadan were misogerkirin û temîyên ku nehêlin careke dî binpêkirin pêk werin bêne pêşkêşkirin.
Di sê mehên borî de, Komîteyê li gelek parêzgehan lêpirsînên berfireh ên meydanî pêk anîne, delîl berhev kirine, dîdevanîyên hin wezîr, rayedar, kesayetên olî, xelkên deverê û kesên koçberkirî belge kirine, lêpirsîn bi hin gumanbarên leşker û yên sivîl re kirine, hejmarek kesên revandî azad kirine. Her weha Komîteyê bi hûrbînî li delîlên dîjîtal nerîye û ji nû ve xelekên zincîra bûyeran li pey hev rêz kirine.
El-Neʼsan destnîşan kir ku lêpirsîn berdewam in ta gihiştina hejmara dawîn a qurbanîyan, û komîte dê daxwaza dirêjkirina karê xwe ji bo temamkirina dosyayan bike.
Ji alîyê xwe ve, berdevkê komîteyê, ‘Emar ‘Izedîn, tekez kir ku karê komîteyê li gor pîvanên navdewletî ye, û her kesê ku destê wî di binpêkirin an gurkirina gotara nefretê de hebe, dê li gorî yasaya Sûrîyê were sizadan.
