Siwêda – SANA
Îro li gundê El-Sûra Mezin a li gundewarê Siwêdayê, kampanyaya “Siwêda ji me ye û di nav me de ye – Sûrîyê piştevana min û te ye” dest pê dike.
Ev kampanya destpêşxerîyeke civakî û niştimanî ye ku ji alîyê komek ciwanên ji parêzgehên cuda yên Sûrîyê ve tê organîzekirin.
Armanca vê kampanyayê berhevkirina alîkarîyan e ji bo xurtkirina hevgirtina civakî û şandina peyameke xurt ji bo tekezkirina hevgirtin û yekîtîya niştimanî û dîyarkirina wê yekê ku Siwêda beşeke bingehdar û jêneger a tevna Sûrîyê ye.
Di eynî demê de, ev çalakî hewl dide pirên bawerî û hezkirinê di navbera şênîyên Siwêdayê û parêzgehên din ên Sûrîyê de ava bike û hêzê bide ciwanên Sûrîyê da ku karibin pêşengîya guhertinên erênî bikin.
Kampanya dê piştevanîya xwe li ser beşên jîyanî yên wekî perwerdehîyê bike, bi rêya misogerkirina pêdivîyên dibistanan û tenduristîyê bi rêya dabînkirina derman û amûran ji bo navendên tenduristîyê, her wiha beşdarîkirina di nûjenkirina binesazî û xizmetguzarîyên sereke yên wekî av, elektrîk û rêyan de bike.
Ev kampanya di çarçoveya gelek destpêşxerîyên sivîl û civakî de li Sûrîyê tê, ku armanca wan xurtkirina hevparîya di navbera pêkhateyên civakê de ye ji bo baştirkirina rewşa xizmetguzarî û aborî. Her wiha, ew çanda bexşandin û beşdarîkirinê di avakirina paşerojeke baştir ji bo Sûrîya piştî rizgarkirinê de xurt dike.
