Şam-SANA
Wezîrê Perwerde û Fêrkirinê Dr. Mihemed Ebdilrehman Tirko, biryara hejmar 2068 / 943 bi dîroka 14ê Rebîul Ewel a 1448an a Koçî (ku dikeve 27ê Tebaxa 2026an a Zayînî) derxist.
Ev biryar guhertina rênimayên cîbicîkirinê yên taybet bi sepandina bendên mersûma hejmar 13 a sala 2026an destnîşan dike, ev yek jî li gorî qanûna hejmar 31 a sala 2024an û biryara wezaretê ya hejmar 493 / 943 pêk hat.
Li alîyê din jî, biryar li ser bingeha armanca yasadanînê ya mersûmê hat girtin, ku armanc jê parastina mafên çandî, zimanî û xurtkirina pirrengîya çandî ye, wekî hîmekî ji bo yekîtîya niştimanî û nasnameya şaristanî ya Sûrîyê. Her wiha bi mebesta misogerkirina wekhevîya derfetan û birêveçûna baş a proseya perwerdeyê ye.
Biryarê destnîşan kir ku divê derfet bê dayîn da ku zimanê Kurdî wekî zimanekî niştimanî li dibistanên hikûmî û taybet, li wan herêmên ku welatîyên Kurd rêjeyeke berbiçav a niştecihan pêk tînin, were xwendin. Her wisa ew wekî beşek ji bernameyên xwendinê yên pejirandî di hemû qonaxên xwendinê de bi rêya du madeyan tê dîtin:
Madeya Zimanê Kurdî: Bi rêjeya 3 waneyan di hefteyê de, ku xwendekar wê ligel her du zimanên Erebî û Îngilîzî dixwîne, û pûanên wê di encama giştî ya dawîn de li gorî rêgezên pejirandî tê tomarkirin.
Madeya Çalakîyan: Bi rêjeya waneyekê di hefteyê de.
Ji bo hêsankirina qonaxa veguhêz, biryarê derfet da xwendekaran ku di yekemîn sala xwendinê de piştî cîbicîkirina wê, madeyên lêkolînên civakî (Dîrok û Cografya) û Felsefeyê yan bi zimanê Erebî yan jî bi zimanê Kurdî li gorî bernameyên pejirandî bixwînin, bi şertê ku ev bijarde tenê bi wê salê ve sînordar bimîne.
Her wiha biryarê Navenda Niştimanî ya Pêşxistina Bernameyên Perwerdeyê erkdar kir ku bernameyên taybet bi madeya zimanê Kurdî ji bo hemû qonaxan amade bike, bi awayekî ku bi çarçoveya niştimanî ya bernameyên xwendinê re hevaheng be, û wergerandina madeya çalakîyan li gorî rêbera çalakîyan a pejirandî pêk bîne.
Derbarê kadroyên perwerdeyê jî, biryarê her du rêveberîyên fêrkirin û çavdêrîya perwerdeyê erkdar kir ku mamosteyan ji nav mîlakê perwerdeyê yan derveyî wê dabîn bikin, li gorî van mercên jêrîn:
Kesên ku xwedîyê bawernameya lîsansê ya zanîngehê yan jî bawernameya peymangeha amadekirina mamosteyan in, û zimanê Kurdî baş dizanin.
Kesên ku xwedîyê bawernameya lîseyê (amadeyîya giştî) ne û zimanê Kurdî baş dizanin, heke pêwîstî û hewcedarîya rasteqîn hebe.
Derbaskirina azmûnên nivîskî û devkî ku Rêveberîya Çavdêrîya Perwerdeyê bi hevahengîya ligel Navenda Pêşxistina Bernameyan li gorî pîvanên yekgirtî pêk tîne, ji bo piştrastbûna ji şarezayîya zimên.
Hêjayî gotinê ye ku Serok Ehmed El-Şeri’ mersûma hejmar 13 a sala 2026an derxistibû, ku piştrast kiribû ku welatîyên Kurd ên Sûrîyê parçeyekî bingehîn û resen ên gelê Sûrîyê ne. Her wisa nasnameya wan a çandî û zimanî parçeyekî jêneger yê nasnameya niştimanî ya Sûrîyê ya pirreng û yekgirtî ye.
