Şam – SANA
Wezareta Xwendina Bilind û Lêkolînên Zanistî îro mufadeleya Xwendina Vekirî li zanîngehên hikûmî yên Sûrîyê ji bo sala xwendinê ya 2025-2026an ragihand.
Li gorî daxuyanîya wezaretê, mufadeleyên qebûlkirinê di bernameyên Xwendina Vekirî ya li zanîngehên hikûmî yên Sûrîyê de, destpêkê ji sala xwendinê ya 2025/2026an, dê bi awayekî navendî di çarçoveya mufadeleyeke yekgirtî de werin kirin.
Wezaretê amaje bi wê yekê kir ku daxwazname bi awayekî elektronîk bi rêya sepana mufadeleyê têne pêşkêşkirin, ev yek ji îro dest pê dike heta dawîya dema karê fermî ya roja Sêşemê 16.12.2025an saet sêyê piştî nîvro. Her wiha xwendekar li navendên piştevanîyê yên li zanîngehan rojane di dema tomarkirinê ya dîyarkirî de, ji saet nehê sibehê heta saet dudo û nîvê piştî nîvro, ji bilî rojên În û Şemîyê, tên pêşwazîkirin.
Xwendekar dê kaxezên xwe yên pêwîst ji bo tomarkirina dawî piştî ragihandina encamên navên kesên di mufadeleyê de hatine qebûlkirin, temam bikin. Her wiha dikarin hemû agahîyên têkildarî şertên serlêdanê û agahîyên din bi rêya malpera Wezareta Xwendina Bilind, rûpela wê ya fermî ya li ser Facebookê û kanala wê ya Telegramê hîn bibin.
Tê zanîn ku pergala Xwendina Vekirî li zanîngehên Sûrîyê li gorî biryarnameya hejmar 383 a sala 2001ê hatiye damezrandin û armanca wê dabînkirina xwendina berdewam e ji bo xwendekar û karkerên ku dixwazin asta xwe ya zanistî û çandî bilind bikin.
