Şam – SANA
Rêveberê Sazîya Giştî ya Pirkirina Tov, Emar El-Mihemed, piştrast kir ku Sazî, tovên genim, pembû, kartol, ceh, nehk, fûl, nîsk û yên din, li kêleka Projeya Niştimanî ya Pirkirina Tovê Kartolan, bi rêya hilberîna xwecihî yan hawardekirinê dabîn dike.
Her wiha bal kişand ser wê yekê ku tov bi rengekî bêjingkirî û pakkirî û bi bihayên guncaw ji bo cotkaran tê pêşkêşkirin.
El-Mihemed di daxuyanîyekê de ji SANAyê re, îro Yekşemê, dîyar kir ku Sazîya Giştî ya Pirkirina Tov, roleke giring di piştgirîkirina sektora çandinîyê de li Sûrîyê dilîze.
Ew jî bi rêya dabînkirina pêdivîyên cotkaran ji tovên başkirî yên berhemên cuda cuda û li gorî taybetmendîyên ku kalîte û berhemdarîyê misoger dikin, her wiha bi rêya qonaxên hevtemamker ên ji pirkirina cureyên pejirandî û çavdêrîya zevîyan dest pê dikin, heta digihîjin bêjingkirin, pakkirin, depokirin û belavkirinê.
Qonaxên li pey hev ên pirkirina tov
Navborî da xuyanîkirin ku xebata Sazîyê piştî pejirandina cureyan ji alîyê komîteyeke pispor ve dest pê dike.
Sazî tovê cotkar ê bi navê tovikok, ku nifşê yekem yê hilberîna tov e, werdigire. Piştre bi armanca ducarekirina tibaban ligel parastina kalîteya wan, li ser pirkirina wan bi rêya qonaxên tovik, bingeh, tomarkirî, pejirandî û başkirî dixebite.
Her wiha El-Mihemed dîyar kir ku, bi armanca ku tov ji bo belavkirina li cotkaran amade bin, di navendên amadekirinê yên ser bi Sazîyê ve rastî proseyên bêjingkirin, paqijkirin û rakirina tiştên wekî zixur, ax, tovên gîyayan û beşên riwekî tên, ligel pakkirin û dermankirina bi kujerên kumikan ên guncaw.
