Waşington-SANA
Sûrîyê di civînên ku li Dewletên Yekbûyî yên Amerîkayê hatin lidarxistin, ji bo nûjenkirin û zindîkirina hêla veguhastina nefta xam (Kerkûk–Banyas) du memorandumên têgihiştinê ligel Iraqê û hevpeymanîyeke kompanyên navdewletî îmze kirin.
Ev gaveke stratejîk e ku armanc dike yek ji girîngtirîn projeyên girêdana neftê li herêmê ji nû ve çalak bike û hevkarîyê di sektora enerjîyê de xurt bike.
Rêveberê Cîbicîkar ê Şirketa Sûrîyê ya Petrolê, Endazyar Yûsif Qeblawî wekî nûnerê hikûmeta Sûrîyê, û Rêveberê Cîbicîkar ê Kompanya Nefta Besreyê, Endazyar Basim Ebdulkerîm Nasir wekî nûnerê alîyê Iraqî, memoranduma têgihiştinê ya yekem a taybet bi nûjenkirina hêla veguhastina neftê (Kerkûk–Banyas) îmze kirin.
Ev îmzekirin bi amadebûna Serokwezîrê Iraqê, Wezîrê Enerjîyê yê Amerîkî û hejmarek berpirsên payebilind pêk hat, û ev gav di çarçoveya piştgirîkirina pêşxistina binesazîyê û vekirina asoyên nû ji bo veberhênan û hevgirtina aborî di navbera her du welatan de tê.
Her wiha, Endazyar Qeblawî memoranduma têgihiştinê ya duyem ligel hevpeymanîyeke navdewletî ku kompanyên Chevron, UCC Holding û TI Capitalê li xwe digire îmze kir, bi mebesta destpêkirina amadekirina lêkolînên teknîkî û darayî û danîna bingehên cîbicîkar ji bo projeyê.
Di nav vê yekê de jî, nûjenkirina xeta borîyan û navendên pê re li gorî pîvanên teknîkî yên herî bilind heye, wekî amadekarîyekê ji bo destpêkirina cîbicîkirinê û xurtkirina hevkarîyên navdewletî û veberhênanên taybet di sektora neft û gazê de.
Ev her du memorandumên têgihiştinê di çarçoveya nêrîna Şirketa Sûrîyê ya Petrolê de tên, ji bo pêşxistina projeyên binesazîyê yên stratejîk û xurtkirina pêgeha Sûrîyê wekî navendeke herêmî ji bo veguhastina enerjîyê, ku ev yek di piştgirîkirina ewlehîya enerjîyê û pêkanîna geşepêdana aborî de dibe alîkar.
Wezîrê Enerjîyê Mihemed El-Beşîr li ser platforma “X”ê ragihand: “Memoranduma têgihiştinê ligel Komara Iraqê ya bira ji bo nûjenkirina xeta borîyên Kerkûk–Banyasê, gaveke stratejîk e ji bo jinûvexebitandina yek ji girîngtirîn xetên veguhastina neftê li herêmê, û xurtkirina pêgeha Sûrîyê wekî korîdoreke herêmî ya enerjîyê ku çavkanîyên herêmê bi Deryaya Spî ve girê dide.”
Wezîr destnîşan jî kir ku ev gav asoyên nû li ber hevkarî û veberhênanê vedike, û rola Sûrîyê di sîstema enerjîyê ya herêmî de xurt dike.
