Şam-SANA
Rêveberê Banka Navendî ya Sûrîyeyê Dr. Ebdulqadir El-Hesrîye, îro yekem peyam bi rêya sîstema diravdana navdewletî (SWIFT)ê ji hemû peyamnêrên bankê yên li cîhanê re şand. Ev pêngav nîşana destpêkirina qonaxeke nû ye piştî rawestaneke ku 14 salan dom kiribû û sedema wê jî ew ceza bûn ku li ser rêjîma rûxîyayî hatibûn sepandin.
Dr. El-Hesrîye ji SANAyê re tekez kir ku vegera karkirina bi rêya SWIFTê, qonaxeke bingehîn e di proseya jinûvetevlîkirina sîstema darayî ya Sûrîyeyê di nav sîstema bankî ya cîhanî de. Dîyar jî kir ku armanca sereke ya vê vegerê, avakirina pira peywendîyan a rasterast di navbera Banka Navendî ya Sûrîyeyê û sazîyên darayî yên navdewletî de ye, ew jî piştî îzolebûneke ku zêdetirî 20 salan dewam kir.
Domandina Pêwendîyên Darayî yên Navdewletî
Rêveberê Banka Navendî amaje bi wê yekê kir ku peyama hatiye şandin, ragihandineke pratîk e ji bo destpêkirina serdemeke nû di sîyaseta darayî û aborî ya Sûrîyeyê de.
El-Hesrîye eşkere kir ku peyama yekem ji Banka Yedek a Amerîkî (Federal Reserve) li New Yorkê re hatiye şandin û gihîştina wê hatiye piştrastkirin.
Amadekirina Kadroyên Teknîkî ji bo Xebitandina Sîstemê
Di berdewamîya axaftina xwe de, El-Hesrîye bal kişand ser wê yekê ku tîmên teknîkî yên bankê di dema borî de beşdarî bernameyên rahênanê bûne da ku şûna karmendên xanenişînbûyî dagirin.
Derbarê bandorên rasterast ên vê pêgavê de, Rêveberê Bankê dîyar kir ku veberhêner êdî dikarin sermaye û qazancên xwe veguherînin û nirxê hawirdeyan bidin.
Vegerandina Yedekan û Pêşxistina Têkoşîna Dijî Spîkirina Pereyan
El-Hesrîye tekez kir ku niha derfet heye yedekên derve dîsa bên bikaranîn û dahat ji wan bê bidestxistin, her wiha xebat tê kirin ji bo vegerandina wan pereyên ku ji ber cezayan bi salan li derveyî welêt hatibûn cemidandin.
Di dawîya daxuyanîya xwe de, El-Hesrîye spasiya Serok Ehmed El-Şeri’ û Wezîrê Karên Derve Es’ed Hesen El-Şeybanî û dîplomasîya Sûrîyeyê kir ji bo rola wan a mezin di rakirina cezayan û girêdana Sûrîyeyê bi sîstema darayî ya cîhanî ve.
Hêjayî gotinê ye ku SWIFT (Society for Worldwide Interbank Financial Telecommunications) tora darayî ya cîhanî ye ku zêdetirî 11 hezar sazîyên darayî li zêdetirî 200 welatan bi hev ve girê dide.
Sîstema SWIFTê li Sûrîyeyê ji ber cezayên ku li ser rêjîma revîyayî hatibûn sepandin, hatibû rawestandin.
