Şam-SANA
Di pêngavekê de ku nîşan dide Pirtûkxaneya Niştimanî ya Sûrîyê veguherîye navendeke hilberîna zanînê, hejmara yekem a kovara “Kelepûr û Pirtûkxane” hat weşandin.
Ev kovareke zanistî ya pispor û nirxandî ye ku rê dide lêkolîneran ku xebatên xwe di qadên kelepûr, zanistên pirtûkxane û zanyarîyan de li gorî pîvanên navneteweyî biweşînin.
Weşandina vê kovarê di çarçoveya projeya Wezareta Çandê de tê ji bo pêşxistina lêkolînên zanistî û weşana akademîk û girêdana kelepûra Sûrîyê bi rêbazên nûjen re.
Ev yek jî rola Pirtûkxaneya Niştimanî ya Sûrîyê di hilberîna zanînê û parastina bîrewerîya niştîmanî de xurt dike.
Jidayîkbûna zanyarî ya Pirtûkxaneya Niştimanî ya Sûrîyê
Sernivîskara kovarê Dr. Mecid Ebdilmecîd Qemer di pêşgotina hejmara yekem de tekez kir ku kovar qonaxeke nû di dîroka Pirtûkxaneya Niştimanî de nîşan dide.
Dr. Mecid dîyar kir ku ev ne tenê weşaneke akademîk a asayî ye, lê belê projeyek e û armanca wê ew e ku rola pirtûkxaneyê wekî sazîyeke hilberîner a ramanê û platformekê ji bo lêkolînerên Sûrî û Ereb zindî bike.
Lêkolînên zanistî ku kelepûr û zanîna hevçerx digihînin hev
Hejmara yekem gurzek lêkolînên zanistî yên nirxandî li xwe digire ku mijarên wêje, rewanbêjî, lêkolîna kelepûrê, ramana Îslamî û zanistên pirtûkxane û zanyarîyan vedikolin.
Her wiha lêkolînên li ser birêvebirina daneyên zîrek, dîyaloga çandan û lêkolînên dîrokî yên berawirdkar jî li xwe digire, ku ev yek vebûna kovarê li ser qadên cuda cuda yên zanînê nîşan dide.
Platformeke akademîk a vekirî ji bo lêkolîneran
Kovar lêkolînên resen bi her du zimanên Erebî û Îngilîzî ji lêkolînerên li zanîngeh û sazîyên akademîk ên Sûrî, Erebî û navneteweyî werdigire.
Her wisa lêkolînerên serbixwe jî dikarin xebatên xwe bişînin, bi mercê ku pabendî rêbazên zanistî bin û beşdarî dewlemendkirina zanînê di qadên kovarê de bibin.
Nirxandina zanistî û gihîştina azad
Kovar sîstema “nirxandina zanistî ya dualî ya nenas” dişopîne. Lêkolîn ji alîyê pisporan ve têne nirxandin bêyî ku navên wan werin eşkerekirin.
Yek ji kesên ku dinirxînin ji hundirê sazîyê û yê din ji derve ye, ev jî asta herî bilind a stşpakî, bêalîbûn û objektîfbûnê di nirxandina lêkolînan de misoger dike.
Pirtûkxaneya Niştimanî ya Sûrîyê mîrateya zanistî diparêze
Kovar xwe dispêre pêgeha dezgehvanî ya Pirtûkxaneya Niştimanî ya Sûrîyê. Bi vî awayî her hejmarek dibe parek ji mîrateya niştimanî ku pirtûkxane diparêze.
Ev yek berdewamîya hilberîna zanistî û gihîştina lêkolîner û nifşên paşerojê bi zanyarîyan garantî dike.
