Şam-SANA
Rêveberê Ragihandinê li Wezareta Enerjîyê Ebdilhemîd Selat, ragihand ku Şirketa Sûrî ya Petrolê niha li ser barkirin û şandina 250 tankerên mazotê ji Banyasê ber bi her du parêzgehên Heleb û Idlibê ve kar dike, wekî beşek ji rêkarên lezgîn ên ji bo çareserkirina qeyrana mazotê.
Selat her wiha da zanîn ku operasyonên dabînkirin û dabeşkirina sotemenîyê ji bo hemû parêzgehên din jî bê navber berdewam dikin.
Mazot di embarên Şirketa Sûrî ya Petrolê de peyda dibe
Rêveberê Ragihandinê li Wezareta Enerjîyê Ebdilhemîd Selat, îro Yekşemê, di daxuyanîyekê de ji bo SANAyê dîyar kir ku madeya mazotê di embarên Şirketa Sûrî ya Petrolê de peyda dibe, ji bilî wan sê keştîyên din jî li deryayê ku ji bo valakirinê amade ne.
Wekî din, wî destnîşan kir ku peymana hejmarek keştîyên din jî hatiye girêdan û ew ê li pey hev bigihîjin, da ku berdewamîya dabînkirina sotemenîyê were garantîkirin.
Selat eşkere jî kir ku qeyrana niha ya mazotê vedigere wan êrîşên ku xetên veguhastina berhemên petrolê yên di navbera Banyas û Himsê de kiribûn armanc, ku di encamê de gihîştina madeyê bo embarên Himsê rawestîya.
Vê rewşê fişara li ser xetên barkirinê li Banyasê zêde kir û di rojên borî de bû sedema derengketina dabînkirina daxwazan.
Hewldanên ji bo xurtkirina herikbarîya dabînkirinê
Navborî bal kişand ser wê yekê ku piştî çakkirina xeta armancgirtî, niha kar li ser jinûvepeydakirina fişarê û pompekirina madeyê bi rêya wê xetê tê kirin, wekî amadekarîyekê ji bo gihîştina wê bo embarên Himsê.
Wî her wiha anî ziman ku bi peydabûna tibabên pêwîst re dê operasyonên barkirinê ji wan embaran tavilê dest pê bikin, bi awayekî ku fişara li ser Banyasê kêm bike û herikbarîya dabînkirinê xurttir bike.
