Şam-SANA
Serok Ehmed El-Şeri’ ji ber rakirina cezayan li ser Sûrîyê bi yekcarî, pîrozbahî li gelê Sûrîyê kir û spasîya Serokê Amerîkî, endamên Kongresê û welatên ku piştgirîya gelê Sûrîyê kirine kir, û tekez kir ku dema avakirina Sûrîyê dest pê kiriye heta ku bigihêje pileyên herî bilind.
Serok El-Şeri’ îro di gotinekê de ji Çîyayê Qasyûnê di rêya hesabê xwe yê li ser platforma “X” ê de got: “Gelê Sûrîyê yê gewre! Silavên Xweda li we bin, ez ji quntara Çîyayê Qasyûnê pîrozbahî û spasîyê li we dikim ji bo rakirina cezayan li ser Sûrîyê. Îro roja yekem e ku Sûrîye bê ceza ye bi saya Xwedayê Mezin, piştre bi hewldan û sebra we ya çardeh salan.”
Serok El-Şeri’ lê zêde kir û got: “Spasîyeke mezin ji bo her kesê ku di heyama Şoreşa Sûrîyê ya Pîroz de qurbanî daye û sebir kiriye, ji bo her kesê ku kîmyawî bêhn kiriye, ji bo her kesê ku koçber bûye û axa xwe berdaye, ji bo her kesê ku di deryayan de xeniqîye, û ji bo xwîna şehîdan a ku ev axa pîroz av daye, heta ku em gihîştin vê serkeftina mezin, a ku bi rakirina qeydan li ser Sûrîyê bi awayekî tam hat tacdarkirin.”
Serok El-Şeri’ wiha domand: “Spasîyeke mezin û taybet ji bo Serok Donald Trump, Serokê Dewletên Yekbûyî yên Amerîkayê ji ber bersivdana wî ji bo daxwaza gelê Sûrîyê, û liberçavgirtina endamên Kongresê qurbanîyên gelê Sûrîyê û bicihanîna daxwaza wan bi rakirina cezayan li ser Sûrîyê.”
Serok El-Şeri’ got: “Spasî her wiha ji bo Serok Receb Teyîb Erdogan, Mîr Mihemed bin Selman û Mîr Temîm Bin Hemed Al Sanî re tê pêşkêşkirin. Her wiha ez spasîyeke mezin li hemû welatên Erebî, Îslamî û Ewropî dikim ku di heyama şer de piştgirîya gelê Sûrîyê kirin û di sala dawî de jî bi rakirina cezayan piştgirî dane wî.”
Serok El-Şeri’ di dawîyê de got: “Îro roja we ye ey gelê Sûrîyê yê gewre, dema êşê çû û bi îzna Xwedê dema avakirinê dest pê kir, dest bi dest em ê vî welatî ava bikin heta ku em pê bigihêjin pileyên herî bilind bi izna Xwedê.”
