Şam-SANA
Wezîrê Ragihandinê Hemze El-Mistefa ragihand ku danûstandinên ku Serok Ehmed El-Şeri’ îro li Koşka Spî bi Serokê Amerîkî re kirin, bi eşkeretî û dîtineke siberojî hatin kirin, û ew bûne destpêka werzekî nû yê têkilîyên Sûrî-Amerîkî. Wî destnîşan jî kir ku Sûrîyê vê dawîyê daxuyanîyeke hevkarîya sîyasî ligel Hevpeymanîya Navdewletî ya ji bo têkbirina rêxistina DAIŞê îmze kiriye, lê heta niha tu pêkhateyên leşkerî li xwe nagire.
El-Mistefa li ser platforma (X)ê got: “Serok El-Şeri’ civînek li Koşka Spî bi Serok Trump, Wezîrê Derve Marco Rubio, Cîgirê Serok J.D. Vance, û Wezîrê Derve û Koçberan Es’ed Hesen El-Şeybanî re li dar xist, û ev civîn bi germî, eşkeretî û dîtineke paşerojî hat pênasekirin. Civîn zêdeyî se’atekê dom kir, û ev serdana dîrokî wekî ya yekemîn a Serokekî Sûrî li Koşka Spî tê dîtin, û nîşan dide destpêka werzekî nû yê têkilîyên Sûrî-Amerkî û vegera tam a Sûrîyê bo qada navdewletî”.
El-Mistefa wiha lê zêde kir: “Serok Trump pesnê veguhertina Sûrîyê û berxwedana gelê wê da, û piştgirîya xwe ya tam bi gotina: ‘We karekî ecêb kir – em piştgirîya we dikin!’ tekez kir. Danûstandinan li ser berfirehkirina hevkarîya aborî, kişandina veberhênanên Amerîkî bo Sûrîyê, û planên rakirina sizayên ku di çarçoveya Qanûna Qeyserê de hatine sepandin, sekinîn. Serok Trump pabendbûna xwe tekez kir û got: ‘Divê em vê yekê bi ser bixin – divê em alîkarîya Sûrîyê bikin!’”
Wezîrê Ragihandinê eşkere kir ku her du alîyan li ser tevlîkirina Hêzên Sûrîya Demokratîk (HSD) di nav refên Artêşa Erebî ya Sûrîyê de gotûbêj kirin, di çarçoveya hewldanên yekkirina sazîyan û misogerkirina aramîya mayînde de. Sûrîyê vê dawîyê daxuyanîyeke hevkarîya sîyasî ligel Hevpeymanîya Navdewletî ya ji bo têkbirina rêxistina DAIŞê îmze kiribû, rola xwe wek hevkar di şerê li dijî terorê û piştgirîkirina aramîya herêmî de tekez kir. Ev rêkeftin tenê sîyasî ye û heta niha tu pêkhateyên leşkerî li xwe nagire.
El-Mistefa bal kişand ser wê yekê ku Serok Trump piştgirîya xwe ji bo rêkeftineke ewlehîyê ya muhtemel ligel Îsraîlê anî ziman, ku armanca wê xurtkirina aramîya niştimanî û herêmî ye. Her wiha, Amerîkayê bi awayekî fermî jinûvevekirina Balyozxaneya Sûrîyê li Wşhingtonê ragihand, bi vî awayî dawî li zêdetirî deh salên girtinê anî.
El-Mistefa got: “Piştî civînê, tavlê Wezîrê Derve Es’ed Hesen El-Şeybanî civîneke xebatê ligel Wezîr Rubio li dar xist ji bo danîna planeke cîbicîkirinê ji bo xalên lihevkirî, ev gavek e ku jidilbûn û pabendbûna her du alîyan ji bo bidestxistina pêşketineke berbiçav nîşan dide”.
