Şam-SANA
Wezareta Derve û Koçberan ragihand ku Serok Ehmed El-Şeri’ tevî Wezîrê Derve û Koçberan Es’ed Hesen El-Şeybanî bi serdaneke fermî çû Koşka Spî, ku ev serdaneke dîrokî û yekemîn e ya bi vî rengî. Li wir, Serokê Amerîkayê Donald Trump pêşwazî lê kir, û ev hevdîtina dîrokî bêhtirî saetekê dom kir û tê de atmosfereke dostane û avaker serdest bû.
Trump kêfa xwe ji rêveberîya Sûrîyê û gelê wê re anî ziman:
Wezaretê di daxuyanîyeke îro de lê zêde kir ku: Serok Trump kêfa xwe ji rêveberîya Sûrîyê ya nû û ji gelê Sûrîyê re anî ziman, û pesnê hewldanên Sûrîyê di serokatîya qonaxa berê de bi serkeftî da, û her weha pesnê destkeftîyên di warê rizgarkirin û vegerandina aramîyê li welêt de jî da. Wekî din jî, wî amadebûna Amerîkayê piştrast kir ku piştgirîya pêwîst pêşkêşî rêveberîya Sûrîyê bike ji bo serkeftina pêvajoya avakirin û geşepêdanê di qonaxa bê de.
Wezaretê destnîşan kir ku bi rêberîya Serok Trump, civîneke berfireh a kar hate lidarxistin ku Wezîrê Derve û Koçberan Es’ed Hesen El-Şeybanî, Wezîrê Derve yê Amerîkî Marco Rubio, û Wezîrê Derve yê Tirkî Hakan Fîdan tê de amade bûn. Armanca civînê şopandina xalên ku her du serok li ser li hev kiribûn û danîna mekanîzmayên zelal ên cîbicîkirinê bû.
Lihevkirina ji bo cîbicîkirina Peymana 10ê Adarê û tevlêkirina HSDê di nav refên Artêşa Erebî ya Sûrîyê de:
Wezaretê dîyar kir ku her du alî di dema gotûbêjan de li ser pêşveçûna di cîbicîkirina Peymana 10ê Adarê de li hev kirin, ku ev yek tevlêkirina Hêzên Sûrîya Demokratîk (HSD) di nav rêzên Artêşa Erebî ya Sûrîyê de di çarçoveya yekkirina sazîyan û xurtkirina ewlehîya neteweyî de li xwe digire. Her wiha, alîyê Amerîkî piştgirîya xwe ji bo gihîştina lihevkirineke ewlehîyê ya bi Îsraîlê re anî ziman, ku armanca wê xurtkirina aramîya herêmî ye.
Piştgirîya hewldanên tevrakirin û veberhênanê li Sûrîyeyê:
Wezaretê amaje bi wê yekê kir ku Serok Trump di warê aborî de piştgirîya welatê xwe ji bo hewldanên tevrakirin û veberhênanê li Sûrîyê nîşan da, û tekezî li ser pabendbûna Dewletên Yekbûyî yên Amerîkayê kir ku dê berdewam be di rakirina cezayên ku li gorî Qanûna Qeyserê hatine sepandin, da ku derfetan ji bo geşepêdanê zêde bike û veberhênanan ber bi xwe ve bîne.
Wezaretê got: “Hevdîtin bi hevguhertina dîyarîyên bîranînê di nav atmosfereke dostane de, ku ruhê vekirîbûn û daxwaza hevpar a ji bo avakirina rûpeleke nû di têkilîyên Sûrî-Amerîkî de nîşan dide, ku têkilîyên ku li ser rêzgirtina dualî û berjewendîyên hevpar ên her du gelên dost hatine avakirin, kuta bû.”
