Wașington-SANA
Serok Ehmed El-Şeri’ îşev bi amadebûna Wezîrê Derve Es’ed Hesen El-Şeybanî û Şanderê Amerîkayê yê Taybet bo Sûrîyê Thomas Barrack, civîneke berfireh bi revenda Sûrî ya li Wașingtonê re li dar xist.
Di civînê de, Serok El-Şeri’ behsa girîngîya girêdana Sûrîyên li derveyî welêt bi welatê wan ve kir, û tekezî li ser rola wan di gihandina rastîya jîyana welat û berevanîya di ber dozên wî yên rewa de kir.
Di axaftina xwe de, Serok El-Şeri’ serkeftina berî 11 mehan bi bîr anî, û piştrast kir ku ew roj ji rojên geş ên dîroka Sûrîyê ne. Her weha got ku destkeftîyên ji wê rojê ve ta niha peyda bûne, çi li ser asta hundir çi jî li ser asta herîmî û navdewletî be, pir in, û nîşana wê yekê ne ku gel û hikûmeta Sûrîyê pişt in jê re ku astangîyan li paş xwe bihêlin û welatê xwe ava bikin.
Ji alîyê xwe ve, El-Şeybanî gotareke kurt pêşkêş kir tê de spasîya revendê kir li ser ked û xebata wê ya ji bo piştgirîya welatê wan li derve, û tekez kir ku hikûmet giringîyeke taybet dide koçberên Sûrî û dixwaze her dem peywendîyên wê bi wan re hebin.
Balyoz Thomas Barrack jî axivî û rola revenda Sûrî di xurtkirina têkilîyên di navbera Sûrîye û civaka navneteweyî de bilind nirxand, û tekez kir ku Amerîka giringîyeke mezin dide piştgirîya destpêşxerîyên ku dixwazin Sûrîyê vegerînin nav çarçoveya wê ya herêmî û navdewletî.
Hejmarek ji amadebûyan nerîn û helwestên xwe anîn ziman, û Serok El-Şeri’ bi zelalî bersiva wan da û spasîya wan li ser beşdarbûn û dilsozîya wan kir
Di dawîya civînê de, Serok El-Şeri’ ji beşdaran xwest ku kenalên peywendîyan di nav wan hikûmeta Sûrîyê de vekirî bimînin, û bi awayekî erênî dan û standinê bi bernameyên niştimanî yên ku dewletê bi rêya Wezareta Karên Derve û Koçberan dest pê kiriye bikin, û careke din ji wan xwest ku bi berpirsyarî pabendî kêşeyên welatê xwe bin.
Serok El-Şeri’ di heman rojê de bi nûnerên rêxistinên Sûrî-Amerîkî re civîyabû da rewşa Sûrîyên li derveyî welat gotûbêj bikin û têkilîyê bi wan re xurtir bikin.
Tê zanîn ku biryar e Serok El-Şeri’ sibe roja duşembê li Koşka Spî hevdîtinê bi Serokê Amerîkayê Donald Trump re pêk bîne.
