Şam-SANA
Serok El-Şara’’, îşev Sindoqa Geşepêdana Sûrî ya ku di rêya qerzên çak re di avakirina Sûrîyê û peredarkirina projeyan de beşdar dibe, li Keleha Şamê di çalakîyekê de da destpêkirin.
Her weha Serok El-Şara’ got: “Xwedê Teala asta peredayîna di rêya xwe de piştî asta fedakarîyê danîye. Îro, em ber bi qonaxeke nû ya avedanî û avakirinê ve ne, em bi destên xwe, bi pereyên xwe û bi keda xwe dîroka nû ya Sûrîyeyê dinivîsin.”
Wekî din jî, lê zêde kir: “Rejîma berê aborîya me wêran kir û gelê me koçber kir. Îro, em gihane hev da ku birînên Sûrîyeyê bikewînin, wê ji nû ve ava bikin û koçber û penaberan vegerînin.”
Wî berdewam kir: “Em destpêkirina Sindoqa Sûrîyeyê radigihînin, û banga bexşîneke comerd dikin da ku tiştê ku rejîma berê wêran kiriye ji nû ve ava bikin, her weha bi zelalîyeke bilind projeyên stratejîk tên peredarkirin.”
Her weha tekez kir: “Ey Sûrîno, ez ne li vir im ku ji bo Sûrîyeyê xêrxwazîyê bixwazim. Xwedê parastina Şamê û gelê wê li xwe girtiye, ew payedartir e ku xêrxwazî lê bê kirin. Hew erkê demê û rûmeta dayîna ji bo welêt tînim bîra we!”
Wî got: “Qencî û comerdî rêyeke parastina statû û rûmetê ye, û “hûn ê negihîjin teqwedarîyê heta ku hûn ji tiştê ku hûn jê hez dikin nedin.” Her weha Xwedê li tiştê ku evd pêşkêşî malbat û welatê xwe dike dinêre.”
Wekî din jî lê zêde kir û got: “Tiştê ku me îro bi dest xistiye, bi saya qurbanîyên mezin ên şehîd û kesên serwinda ye, û qurbanîya wan emanetek e li ser milê me da ku em di avakirina welêt berdewam bin!”
Li talîyê jî, got: “Sûrye îro dildarîya we diceribîne û rûmeta beşdarîya di avakirina wê de dide we! Werin em bi hev re, dest bi dest û bi yek dilî bixebitin! Wesslamu eleykum!”
Her weha Rêveberê Giştî yê Sindoqê, Mihemed Sefwet Rislan, got: “Em îro gaveke neteweyî ya bêhempa radigihînin ku dihêle Sindoq bibe pisûleyeke avakirinê wekû wefadarîyekê bo xwîna şehîdan!
Wekî din jî, Rislan rave kir ku Sindoq xwedî nêrîneke têkûz e ji bo yekkirina xebatên dewletê û gelê wê, civaka sivîl û pişka taybet, di heman demê de, zelalîyê misoger dike û derfetên kar û projeyên xizmetguzarî û aborî peyda dike.
Her weha wî destnîşan kir ku Sûrîye piştî wêrankirinê dikeve qonaxeke nû ya avakirinê, û piştî êşê jî hêvî tê, her weha Sindoq dê bibe sembola zelalî, karîgerek bo geşepêdanê û hêzeke neteweyî ya yekgirtî.
Hêjayî gotinê ye Sindoq li gorî Fermana Hejmar 112 a 2025an hatiye damezrandin. Ew sazîyeke aborî ye û bi Serokatîya Komarê ve girêdayî ye û navenda wê li Şamê dimîne. Armanca wê jî ew e ku bi rêya qerzên çak dest bi avakirinê bike û binesazîyê pêş bixe û projeyan peredar bike. Jêderên wê yên peredarîyê jî, bexşîn, hîbe û dîyarî ne.
