Kînşasa-SANA
Desthilatên Kongoyî îro bi awayekî fermî ragihandin ku pêla dawî ya belavbûna şewba Ebolayê bi dawî hatiye, ku ji dawîya meha Tebaxa borî ve bûbû sedema mirina bi dehan kesan.
Ajansa France Press (AFP) ji ser zarê Rêveberê Enstîtuya Niştimanî ya Tenduristîya Giştî, Dieudonnê Mwamba Kazadi, ragihand: “Şewba Ebolayê li Komara Kongoya Demokratîk bi awayekî fîzîkî bi dawî hat.”
Her wiha navborî got: “Ji 53 pêketîyên piştrastkirî 34 rewşên mirinê hatin tomarkirin, û tê texmînkirin ku vîrus bûye sedema mirina 11 nexweşên din jî; bi vî awayî hejmara giştî ya mirîyên ku guman tê kirin ji ber Ebolayê ne, gihîşte 45an.”
Komara Kongoya Demokratîk ji dema vedîtina vîrusê di sala 1976an de heta niha, bûye şahida 16 pêlên Ebolayê.
Desthilatdarên Kongoyî di nîvê meha Îlonê de ragihandibûn ku piştî vedîtina vegera vîrusê li herêma Kasai ya li navenda welêt, dest bi kampanya derzîlêdanê kirine.
Vîrusa Ebolayê wekî vîruseke ku zû belav dibe û pir caran kujer e tê naskirin, tevî ku di demên dawî de vaksîn û derman jê re hatine dîtin. Di 50 salên borî de li Afrîkayê bûye sedema mirina nêzîkî 15 hezar kesan.
Ev nexweşî cara yekem di sala 1976an de li Kongoya Demokratîk hat vedîtin. Vîrus bi rêya şileyên laş tê veguhastin û kesê pêketî tenê piştî derketina nîşanan dibe veguhêz (nexweşîyê derbasî kesên din dike).
