Şam-SANA
Wezîrê Xwendina Bilind û Lêkolînên Zanistî Merwan El-Helebî, avakirina komîteyeke hevbeş a Sûrî-Tirkî ji bo çareserkirina dosyaya zanîngehan li bakurê Sûrîyê û bidawîanîna vê dosyayê berî destpêkirina sala xwendinê ya bê, ragihand.
El-Helebî li ser rûpela xwe ya Facebookê, duh Înê bal kişand ser wê yekê ku dosyaya zanîngehan li bakurê Sûrîyê yek ji mijarên herî girîng bû ku di civîna ku ligel Encumena Xwendina Bilind a Tirkîyê (YÖK) hat gotûbêjkirin.
Encumenê pêşwazî li rêkarên wezaretê yên ji bo birêxistinka rewşa van zanîngehan û çareserkirina mercên wan kir, bi awayekî ku parastina mafên xwendekaran û birêxistina proseya perwerdeyê li gorî çarçoveyên qanûnî û akademîk ên pejirandî misoger dike.
El-Helebî destnîşan kir ku Encumena Xwendina Bilind a Tirkîyê amade ye bi temamî ligel wezaretê hevkarîyê bike ji bo bidawîanîna vê dosyayê bi yekcarî, bi rêya avakirina komîteyeke hevbeş a Sûrî-Tirkî ji bo lêkolînkirina ketwara niha ya zanîngehan û danîna çareserîyên cîbicîkar ên guncaw ku berjewendîya akademîk pêk tînin û mafên hemû xwendekaran diparêzin.
Wezîrê Xwendinê dîyar kir ku komîte dê ji alîyê Sûrî ve tîma ku wezaretê bi serokatîya alîkarê wezîr bo karûbarên xwendekaran ava kiriye li xwe bigire, di heman demê de alîyê Tirkî nûnerên Encumena Xwendina Bilind li xwe digire, bi mercê ku di destpêka vê hefteyê de dest bi karên xwe bike, heta temamkirina hemû rêkarên pêwîst û girtina vê dosyayê berî destpêkirina sala xwendinê ya bê li Sûrîyê.
