Şam-SANA
Serokê Desteya Enerjîya Atomî ya Sûrîyê Muder El-Ugle, piştrast kir ku Sûrîye ji dil û şefafîyet li ser çareserkirina dosyayên atomî yên girêdayî serdema rejîma berê kar dike. Her wiha bal bir ser rapora Ajansa Navneteweyî ya Enerjîya Atomî ya ku tê de pêşwazî li hevkarî û vebûna Sûrîyê di vî warî de hatibû kirin, û destnîşan kir ku ev yek asta pabendbûna welat di xebata wî ya ligel ajansê de nîşan dide.
El-Ugle di daxuyanîyekê de ji bo SANAyê, îro Çarşemê got: “Me gihîştineke tam ji bo cihên daxwazkirî dabîn kir û daneyên pêwîst pêşkêş kirin, ku vê yekê rê da Ajansa Navneteweyî ku dozên hilawistî yên têkildarî garantîyên çalakîyên atomî yên rejîma têkçûyî yekalî bike; di nav de kontrolkirina cihê El-Kibar ê li Dêrezorê û navendên girêdayî wê, her wiha eşkerekirina derdora 73 ton ji uranyuma xwezayî û xistina tevahîya wan di bin pergala garantîyên ajansê de.”
El-Ugle lê zêde kir û got: “Hemû madde û navendên atomî ketine bin pergala garantîyan, û dîtina me ya niştimanî li ser berfirehkirina bikaranînên aştîyane yên enerjîya atomî di warên tenduristî, enerjî, xurek û avê de ava dibe, ji bo piştgirîya geşepêdana domdar û civakan, û xurtkirina bawerîya navneteweyî.”
Ajansa Atomî: Tiştê ku Şamê pêşkêş kir rê da me ku em lêkolînan temam bikin
Ajansa Navneteweyî ya Enerjîya Atomî di raporekê de ku ajansa Reutersê duh Sêşemê veguhastibû, pêşwazî li hevkarîya Sûrîyê û şefafîyeta wê di çareserkirina dozên garantîyên têkildarî çalakîyên atomî yên rejîma berê de kiribû, û destnîşan kir ku ew zanyarîyên ku Şamê pêşkêş kirine û dabînkirina gihîştina bi navend û zanyarîyên daxwazkirî, rê da ajansê ku lêkolînên xwe yên têkildarî vê mijarê temam bike.
Ajansê di rapora xwe de got: “Piştî wergirtina zanyarîyên pêwîst û dabînkirina gihîştina bi wan ji alîyê Sûrîyê ve, ajansê pirsên têkildarî dozên garantîyên hilawistî ku berê ji bo Encumena Rêveberên Ajansê hatibûn ragihandin, zelal û yekalî kirin.”
